គ្រប់ស្ត្រីមេផ្ទះ សុទ្ធតែធ្លាប់បានចម្អិនបបរ គ្រាន់តែថាបបរ ដែលគាត់បានចម្អិននោះ មានរសជាតិបែបណា និងប្រភេទសាច់អ្វី។ថ្ងៃនេះយើងសូមបង្ហាញអ្នកនូវវិធីធ្វើម្ហូបមួយមុខដល់ស្ត្រីមេផ្ទះគ្រប់រូប ដែលមុខម្ហូបនេះមានឈ្មោះថា បបរមាន់ស៊ុតខ្មៅដែលបបរមួយនេះវាធ្វើចេញពីសាច់មាន់ តែអ្វីដែលប្លែកនោះគឺ វាមានបន្ថែមនូវស៊ុតខ្មៅពីលើទៀត។
គ្រឿងផ្សំ
- សាច់មាន់ ១ភ្លៅ
- ស៊ុតខ្មៅឆ្អិន ១គ្រាប់
- ជីវ៉ាន់ស៊ុយហាន់រួច ១ស្លាបព្រាបាយ
- ជីរណា ១គល់
- អង្ករ ១០០ក្រាម
- ស្ករស ១ស្លាបព្រាកាហ្វេកន្លះ
- អំបិល ១ស្លាបព្រាកាហ្វេ
- ម្រេចគ្រាប់ ៥ទៅ៦គ្រាប់
- ម្រេចម៉ត់ស ១ ចុងស្លាបព្រា
- ខ្ទឹមស ៥កំពឹស
- ទឹកស៊ីអ៊ីវ ១ ស្លាបព្រា
- ខ្ទឹមបំពង ១ ស្លាបព្រា
- ស្លឹកខ្ទឹម ២ គល់
វិធីធ្វើ
១. ជាចំនុចចាប់ផ្តើមដែលអ្នកត្រូវធ្វើ កាត់ហាន់ជីរណា ចិញ្ច្រាំខ្ទឹម ២កំពឹស និងស្លឹកខ្ទឹម ជាមុន។ យកសាច់ភ្លៅមាន់ពាក់កណ្តាល យកមកភ្លើយយកតែសាច់ រួចចិញ្ច្រាំវាអោយម៉ត់ បន្ទាប់មករោយម្រេចស ជីវ៉ាន់ស៊ុយ ហើយដាក់ទឹកស៊ីអ៊ីវចូល ច្របល់ចូលគ្នាឱ្យសព្វទុកអោយចូលជាតិ ធ្វើការមូលវាជាដុំតូចៗ។
២. ជាបន្តមកទៀត អ្នកត្រូវដាក់ដាំទឹកអោយពុះ ក្រោយមកបង់ខ្ទឹមស (ដំឱ្យសំប៉ែត) ម្រេចគ្រាប់ ជីវ៉ាន់ស៊ុយ ភ្លៅមាន់ដែលនៅសល់ចូល បន្ថែមអំបិល រួចធ្វើការរំងាស់វា អោយចេញជាតិ និងឆ្អិនសាច់។ ក្រោយពីសាច់ឆ្អិនហើយ អ្នកអាចស្រង់យកខ្ទឹម ជី និងសាច់ចេញ(ដើម្បីធ្វើការបេះសាច់វាជាសរសៃ) ដាក់អង្ករដែលលាងរួចចូល ស្ងោរអង្ករឱ្យរីកក្លាយទៅជាបបរ និងដាក់ស្ករស សាច់ដែលមូលជាដុំៗចូល។ ពេលញ៉ាំ អ្នកអាចពុះស៊ុតខ្មៅជា ៤ ចម្រៀក បន្ទាប់មក យកមកដាក់ពីលើបបរ ហើយបន្ថែមសាច់ដែលហែករួច ស្លឹកខ្ទឹម ជីវ៉ាន់ស៊ុយ ខ្ទឹមបំពង ម្រេចសពីលើ។
គ្រឿងបន្ថែម
អ្នកអាចបន្ថែមខ្ញីហាន់ ឆាខ្វៃ ក៏ដូចជាស៊ុត ១គ្រាប់ តាមចំណូលចិត្ត។