គេធ្វើពិធីបុកល័ក្តនេះដើម្បីយកល័ក្តមកធ្វើធ្មេញបំពេញលក្ខណ៍កូនស្រីដែលចូលម្លប់ ។ នារីព្រហ្មចារិនី២នាក់ត្រូវចាត់ឲ្យមកបុកល័ក្តក្រមរ (ល័ខ/ល័ក្តម៉្យាង ដែលមានពណ៌ក្រហមជាំ គេបន្ទំនៅលើមែកឈើស្នូលសង្កែធ្នង់ជាដើម) ចេញពីមែកឈើរួចទៅប្រគល់ឲ្យអាចារ្យ ។ អ្នកដើរតួបុកល័ក្តច្រើនតែជ្រើសរើសចេញពីអ្នកដែលចេះកំប្លុកកំប្លែង ។ គេយក ល័ក្តក្រហមទៅដាក់ក្នុងត្បាល់ហើយអ្នកទាំងពីររាំបញ្ចេញក្បាច់ដើរជុំវិញត្បាល់ ។ ម្នាក់ដៃម្ខាង កាន់ផ្តិលដែលមានស្លឹកខ្លុងត្បែងទ្រាប់នៅបាតផ្តិលរាំដើរមុខក្រោយគ្នា ។ ទាំងពីរនាក់ច្រៀង បទបុកល័ក្តច្រៀងផងបុកផងរហូតទាល់តែល្អិតទើបនាំគ្នាកាយដាក់ក្នុងផ្តិលរួចហើយ ប្រគល់ជូនអាចារ្យ។
