ឈប់បានឈប់ទៅរឿងអង្គុយយូរលើស៦ម៉ោងក្នុង ១ថ្ងៃ
ចុះផ្សាយ៖ ថ្ងៃទី ២២ កក្កដា ឆ្នាំ២០១៧ ម៉ោង ១០:៣៥នាទី
ទៅថ្ងៃអនាគត មនុស្សច្រើនតែស្លាប់ដោយសារភាពអសកម្មជាជាងជំងឺផ្សេងៗ ។ ការអង្គុយ ជាបញ្ហាមួយធ្ងន់ធ្ងរ ។ នៅក្នុងខ្លួនអ្នកមានសាច់ដុំច្រើនជាង ៦០០ និងឆ្អឹងជាង ២០៦ សម្រាប់ឱ្យអ្នកអាចធ្វើចលនាបាន មិនមែនអង្គុយពេញមួយថ្ងៃទេ ។
រាងកាយអសកម្មនឹងបាត់បង់ភាពរហ័សរហួន ហើយឆាប់ចាស់ ។ ការសិក្សាបានអះអាងថា អ្នកអង្គុយច្រើនជាង ៦ម៉ោងក្នុង ១ថ្ងៃ ងាយប្រឈមនឹងគ្រោះថ្នាក់ដល់ស្លាប់ច្រើនជាង ៥០% ដោយសារបញ្ហាសុខភាព (បញ្ហាបេះដូង ធាត់ជ្រុល ជំងឺមហារីក ឬទឹកនោមផ្អែម) ។ តើនឹងមានអ្វីកើតឡើងខ្លះ ពេលអ្នកអង្គុយពេញមួយថ្ងៃ ?
គ្រោះថ្នាក់ ១
ពេលអ្នកអង្គុយយូរពេក លំពែងនឹងផលិតអាំងស៊ុយលីនកាន់តែច្រើនឡើង ។ យូរៗទៅ បញ្ហានេះនឹងធ្វើឱ្យអ្នកកើតជំងឺទឹកនោមផ្អែម ។
គ្រោះថ្នាក់ ២
កាលណាអ្នកអង្គុយយូរពេក លំហូរឈាមទៅកាន់ខួរក្បាលកាន់តែតិចទៅ ហើយវាអាចប៉ះពាល់ដល់មុខងារខួរក្បាល ។
គ្រោះថ្នាក់ ៣
អង្គុយរហូតពេញមួយថ្ងៃ សកម្មភាពប្រព័ន្ធរំលាយអាហារនឹងត្រូវរាំងស្ទះ ។ បញ្ហាទល់លាមក ហើមពោះ និងក្រពះនឹងកើតឡើង ។
គ្រោះថ្នាក់ ៤
ការអង្គុយយូរពេកក៏នាំឱ្យខូចឆ្អឹងខ្នង ។ លំហូរឈាមទៅកាន់សាច់ដុំលើឆ្អឹងខ្នងមិនបានគ្រប់គ្រាន់ ។ បញ្ហានេះនឹងបណ្តាលឱ្យអ្នកឈឺខ្នង ឈឺក ។
គ្រោះថ្នាក់ ៥
ការអង្គុយយូរពេកក៏អាចបង្កើនជាតិខ្លាញ់ច្រើនក្នុងសរសៃឈាម ហើយធ្វើឱ្យអ្នកមានបញ្ហាជំងឺបេះដូង ។
គ្រោះថ្នាក់ ៦
លំហាត់ប្រាណមិនបានគ្រប់គ្រាន់ក៏ធ្វើឱ្យឆ្អឹងខ្សោយ ងាយប្រឈមនឹងជំងឺពុកឆ្អឹង ។
គ្រោះថ្នាក់ ៧
ប្រសិនបើអ្នកសកម្ម អ្នកនឹងគេងបានលក់ស្រួល ចៀសផុតពីជំងឺមហារីក ពីអារម្មណ៍ក្រៀមក្រំ ភាពស៊ាំ និងមុខងារខួរក្បាលកាន់តែប្រសើរឡើង ឆ្អឹង និងសាច់ដុំកាន់តែរឹងមាំ រក្សាលំនឹងសម្ពាធឈាម និងសុខភាពល្អពេញបរិបូរ។
ផ្តល់សិទ្ធដោយ៖ មង្គលការ
